Chereé, een van Suid-Afrika se mees geliefde vroulike kunstenaars, is terug in die kollig met die uitreiking van ’n splinternuwe enkelsnit, ANOTHER DAY; die eerste vrystelling vanaf haar langverwagte album met dieselfde naam.
Hierdie lied dui nie net op ’n nuwe hoofstuk in Chereé se loopbaan nie, maar is ook ’n persoonlike reis terug na haar liefde vir country; ’n genre wat sy nog altyd koester.
Met meer as twee dekades se ervaring in die musiekbedryf, is die sangeres gereed om haar gehoor weer bekend te stel aan die opregte en emosionele diepte van country-musiek.
ANOTHER DAY is vir haar meer as net ’n liedjie – dis ’n opsomming van haar as kunstenaar. Na jare van sukses in die Afrikaanse bedryf, het sy besluit om terug te keer na die musiek wat haar oorspronklik geïnspireer het. Die lied weerspieël die temas van liefde, verlies, hoop, en geloof – iets waarmee sy persoonlik kan vereenselwig.
Die musiekvideo, wat ook op 4 Oktober 2024 vrygestel word, is verfilm by Tweefontein Melkery in Kemptonpark.
Met die talentvolle span van Coolerbox Brothers aan die stuur van sake, beeld die video die hartseer en boodskap van die lied perfek uit, met Michael van Zyl as regisseur en Tshepang Modisane agter die kamera.
Siobhan Venter se artistieke visie het elke toneel opgehelder, terwyl grimeerkunstenaar Loraine Olivier gesorg het dat Chereé pragtig lyk voor die kamera. Die samewerking van hierdie kreatiewe span het ’n boeiende video opgelewer wat die emosionele aspek van die lied perfek komplementeer.
Kyk dit hier: https://www.youtube.com/watch?v=-5jdRqBc6Xc
Oor haar nuutste projek sê sy: “Hierdie album is regtig ANOTHER DAY vir my. Dit is die begin van my reis terug na my wortels, terug na my eerste liefde in musiek. Ek het my stem weer gevind, en ek het ’n storie om te vertel, een van liefde, verlies, hoop en geloof.”
Chereé se passie vir stories vertel deur musiek word weerspieël in elke noot en dien as ’n opregte uitnodiging vir luisteraars om saam met haar op hierdie nuwe avontuur te gaan.
Dit is ’n lied wat die eenvoud en suiwerheid van country-musiek vasvang, met sy tydlose akkoorde en opregte lirieke wat met algemene ervarings vereenselwig.
Die volledige album, ANOTHER DAY, verteenwoordig ’n beduidende keerpunt in die musikant se loopbaan.
Na meer as 23 jaar van sukses sien sy uit om weer iets te doen wat sy waarlik geniet. As kind uit ’n musikale familie, is sy blootgestel aan country-legendes soos Dolly Parton en Patsy Cline, sowel as Faith Hill en Deanna Carter. Dit is hierdie verbintenis met die emosionele diepte en eenvoud van country-musiek wat sy graag met haar aanhangers wil deel.
Nadat haar pad onlangs toevallig gekruis het met dié van die plaaslike musiek-ikoon, Sunette Bridges – ’n mede-country-liefhebber met soortgelyke lewenservaring – het hulle besluit om ANOTHER DAY saam aan te pak.
“Dit was ’n droom wat waar geword het om saam met Sunette te werk en om die eerste kunstenaar te wees wat by haar platemaatskappy, Rivers & Bridges Music, geteken te word,” deel sy. “Ek is ongelooflik trots dat dit die eerste album is wat deur ’n vrou in ons bedryf vervaardig is.”
Verder is die opname ook oor twee kontinente gedoen, met Chereé en Sunette wat saamgewerk het vanuit hul onderskeie huise in Suid-Afrika en die VSA. Die eindresultaat is ’n versameling liedjies wat nie net die tradisionele klanke van country-musiek vier nie, maar ook ’n moderne kinkel aan die genre bied, wat dit relevant maak vir vandag se gehoor.
Oor die jare, het Chereé verskeie Afrikaanse treffers gehad, waaronder 30 Dae in die Somer en Prins van die Geweste, wat vir haar ’n toegewyde aanhang besorg het. Dit was veral die album, Wilde Waters, wat haar plek verder in die harte van aanhangers verstewig het deur Afrikaanse en country-invloede te kombineer.
Tog, ten spyte van haar sukses, het sy altyd die roepstem van country-musiek gevoel, ’n genre wat ’n konstante in haar lewe was. “My aanhoudende begeerte om country-musiek te sing, het my nooit verlaat nie,” erken sy. “Dit was ’n droom wat nie wou vervaag nie, en nou is dit ’n droom wat waar geword het.”
Met die vrystelling van ANOTHER DAY betree Chereé ’n nuwe era in haar loopbaan. Sy keer nie net terug na die genre waarmee sy oorspronklik bekendheid verwerf het nie, maar neem ook ’n dapper tree vorentoe in haar persoonlike reis as kunstenaar.
“Ek is verlief op die suiwerheid van country-musiek,” sê sy. “Dit praat van familie, liefde, vreugde, hartseer, en genesing, en dit is die stories wat ek wil vertel.”
Aanhangers kan oor die volgende paar maande uitsien na nog ’n paar vrystellings vanaf die album en sy is baie opgewonde om haar nuwe musiek met bekende en nuwe luisteraars te deel.
ANOTHER DAY is nou beskikbaar op alle digitale stromingsplatforms. Kry dit hier: https://xn--chere-fsa.hearnow.com/
SNITTE OP DIE ALBUM:
Another Day
Slow Dance
Damn
Heart
The Valley
SOSIALEMEDIASKAKELS:
Instagram: @cheree_music
Facebook: facebook.com/chereemusic
Twitter: @chereemusic
Luister gereeld na jou gunsteling stasie!