Dalene Matthee se TOORBOS kry lewe op die silwerskerm! – Musical Venture Radio

Dalene Matthee se TOORBOS kry lewe op die silwerskerm!

Die bekende roman, TOORBOS, uit die pen van bekroonde skrywer, Dalene Matthee, gaan binnekort lewe kry op die silwerskerm met gesoute vervaardiger, André Scholtz, aan die stuur van dié besonderse rolprent. 

Hierdie romantiese drama is gebaseer op die 2003-topverkoper met dieselfde naam, wat deel uitmaak van die oorlede skrywer se arsenaal van suksesvolle bosverhale. Dit vertel die storie van Karoliena Kapp, ’n vrou met ’n intieme liefde en verbintenis met die bos. Wanneer sy egter die man van haar drome ontmoet, veroorsaak hierdie einste bekoring ’n liefdesdriehoek wat dreig om haar uitmekaar te skeur wanneer sy moet kies tussen trou en dorptoe trek of agterbly in die plek waar sy veilig voel. Die besluite wat sy neem, lei tot ’n onvergeetlike avontuur van innerlike konflik, verandering, aanvaarding en, bowenal, liefde.

TOORBOS word vervaardig deur bekroonde rolprentmaker, André Scholtz, onder leiding van die knap draaiboekskrywer en regisseur, René van Rooyen. Dié boeiende speelfilm lê die bekende vervaardiger na aan die hart en is ook die projek waarmee hy sy vyftigste jaar in die rolprentbedryf gaan vier in 2019. “Sowat drie jaar gelede het ek met ’n kennis van my, Peet van Rensburg, gesels oor die vervaardiging van ’n ander rolprent, toe hy vir my die boek gegee het om te lees. Na een maal se deurlees, het ek geweet dat hierdie nog ’n Dalene Matthee-wenner is! Dit speel af in die 1930’s in die Knysnabos, toe die regering houtkappers wou dwing om op die dorp te gaan woon. Hillary Matthee, Dalene se dogter, werk nou saam met ons aan die fliek en is baie bly dat ons besluit het om dit te maak,” sê hy.

Scholtz is een van die land se mees ervare rolprentvervaardigers en het meer as dertig films, asook sewe televisiedramas en –komedies, vir SABC, M-Net en kykNET, op sy kerfstok. Hy is veral bekend vir sy betrokkenheid by die suksesvolle Oh Schucks-reeks saam met Leon Schuster, asook vir die bekroonde rolprente, ‘n Paw Paw vir my darlingDie Wonderwerker en Meerkat Maantuig.

René van Rooyen is die mede-eienaar van Red Letter Day Pictures in die Kaap en het bekendheid verwerf as draaiboekskrywer en regisseur van die lokettreffer, Mooirivier, asook Nantes. Sy is ook mede-vervaardiger en –draaiboekskrywer van Hollywood in my Huis, wat in 2015 vrygestel is.

Die verfilming van TOORBOS sal op 21 Mei 2018 in die Knysnabos afskop. Hierdie projek word aangepak met die ondersteuning van M-Net, sonder wie se hulp en bystand dit nie die lig sou sien nie, asook Die Nasionale Rolprent- en Videostigting (NFVF), die Departement van Handel en Nywerheid (DTI) en Ster-Kinekor Entertainment.

 

Alishia van Deventer
alishia@starburstmusic.co.za / 083 635 4717

Starburst Promotions
Office: 083 635 4717
http://www.starburstmusic.co.za

Leave a Reply

%d bloggers like this: